ඉන්දියාවේ Gen Z විරෝධතා: එක වෛරල් සටහනකින් ‘කොක්රෝච් ජනතා පක්ෂය’ හැදුණු හැටි සහ අභිජීත් දිප්කේ ජාතික චරිතයක් වූ හැටි
ඉන්දියාවේ තරුණ (Gen Z) විරෝධතා ව්යාපාරය ආරම්භ වුණේ අභිජීත් දිප්කේ කියන තරුණයා තමන්ගේ කෝපය පළ කරමින් X (ට්විටර්) ගිණුමේ තැබූ පුංචි සටහනකින්.
“සියලුම කැරපොත්තන් එකතු වුණොත් මොකද වෙන්නේ?”
30 හැවිරිදි දේශපාලන මාධ්ය උපදේශකයෙකු වන අභිජීත් දිප්කේ, මේ එක පණිවිඩයෙන් මුළු රටේම අවධානය දිනාගත් තරුණ නායකයෙකු බවට පත් වුණා.
2014 දී අගමැති නරේන්ද්ර මෝදි බලයට පත් වූ පසු, ඔහුගේ රජයට මුහුණ දෙන්න සිදුවූ විශාලතම වීදි විරෝධතාවයක් බවට මෙය දැන් පත්ව තිබෙනවා.
දිප්කේ මේ සටහන දැම්මේ මැයි 16 වැනිදා. ඉන්දියාවේ අග්ර විනිශ්චයකාර සූර්යා කාන්ත්, රැකියා නැති තරුණයන්ව “කැරපොත්තන්ට” සමාන කරමින් කළ ප්රකාශයකට ප්රතිචාරයක් විදිහටයි ඔහු එය ලිව්වේ.
තමන් කියපු දේ ජනතාව වැරදියට තේරුම් ගත්තා කියලා අග්ර විනිශ්චයකාරවරයා පස්සේ කිව්වත්, ඒ වෙනකොටත් දිප්කේගේ සටහන සමාජ මාධ්ය පුරා වේගයෙන් පැතිර ගිහින් තරුණයන්ගේ කෝපය අවුස්සලා ඉවරයි.
ඊටපස්සේ ‘කොක්රෝච් ජනතා පක්ෂය’ (Cockroach Janta Party – CJP) නමින් උපහාසාත්මක සමාජ මාධ්ය පිටුවක් නිර්මාණය වුණා. ඉන්දියාවේ තරුණයන් මිලියන ගණනකට තමන්ගේ කලකිරීම පිට කරන්න ඒක හොඳ සංකේතයක් වුණා.
රැකියා නැතිකම, විභාග ප්රශ්න පත්ර පිටවීම සහ රජයේ වගකීම් විරහිතභාවය තමන්ට තියෙන ප්රධාන ගැටලු ලෙස විරෝධතාකරුවන් පෙන්වා දෙනවා.
ඉන්දියානු තරුණ විරෝධතා ෆෝන් තිරයෙන් වීදියට බසී
පසුගිය දවස්වල නවදිල්ලියට දහස් ගණන් තරුණයන් එකතු වුණා. ඔවුන් ඉල්ලන්නේ අධ්යාපන අමාත්ය ධර්මේන්ද්ර ප්රධාන්ගේ ඉල්ලා අස්වීමයි.
මැයි මාසයේදී සිසුන් ලක්ෂ 20 කට ආසන්න පිරිසකට බලපෑ වෛද්ය ප්රවේශ විභාගයේ ප්රශ්න පත්රයක් පිටවීමත් එක්කයි මේ විරෝධතා පටන් ගත්තේ. ඒ වගේම මේ ප්රශ්නය නිසා සිසුන් කිහිප දෙනෙක් සියදිවි නසාගත් බවටත් ඔවුන් චෝදනා කරනවා.
මේ අතර, මුම්බායි ඇතුළු තවත් නගර කිහිපයකම කුඩා මට්ටමේ විරෝධතා පැවැත්වුණා.
මේ මුළු ව්යාපාරයේම ප්රධානියා විදිහට කටයුතු කරන්නේ දිප්කේ.
ඔහු ජූනි මුල වෙනකම් ඇමෙරිකාවේ බොස්ටන් නගරයේ හිටියේ. ඒත් මධ්යම දිල්ලියේ ජන්තර් මන්තර් අසල විරෝධතාවයක් පටන් ගන්න ඔහු ආපසු ඉන්දියාවට ආවා.
එදා ඉඳන් ඔහු දිගටම විරෝධතා පවතින ස්ථානයේම ඉන්නවා. පසුගිය සඳුදා පොලිසිය විරෝධතාකරුවන්ට පහර දීමත් එක්ක ජනතා කෝපය තවත් වැඩි වුණා. ඒ එක්කම දිප්කේගේ නම තවත් ප්රසිද්ධ වුණා. රොයිටර් පුවත් සේවය වගේ ජාත්යන්තර මාධ්ය පවා මේක මෝදි රජයට ආපු ලොකුම අභියෝගයක් විදිහට විස්තර කළා.
ටී-ෂර්ට් එකකුයි ජීන්ස් එකකුයි ඇඳගත්තු, රැවුල වවාගත්තු මේ තරුණයා උස් කරපු වේදිකාවක ඉඳන් නිතරම සෙනඟ අමතනවා.
රජයට දිගටම බලපෑම් කරන අතරම සාමකාමීව ඉන්න කියලා ඔහු තරුණයන්ගෙන් ඉල්ලනවා.
මේ සංවිධානයට තවත් සංවිධායකයන් හිටියත්, හැමෝගෙම අවධානය දිනාගත් ප්රධාන චරිතය වුණේ දිප්කේ. ඒ නිසා ඔහුට ප්රශංසා වගේම චෝදනාත් එල්ල වුණා.
පසුගිය සතියේ ඔහු කතාවක් පවත්වද්දී එක් කාන්තාවක් ඇවිත් ඔහුට නිල් පාට තීන්ත ප්රහාරයක් එල්ල කළා. ඒ සංවිධානයෙන් රාම් දෙවියන්ට අපහාස කරනවා කියලා ඇය චෝදනා කළා.
ඒ සිදුවීමේ වීඩියෝව සමාජ මාධ්යයට දාපු දිප්කේ, “නිල් කියන්නේ මගේ පාට” කියලා සටහනක් දැම්මා.
ඒකෙන් ඔහු අදහස් කළේ ඉන්දියාවේ පීඩිත ජනතාව වෙනුවෙන් පෙනී සිටින අම්බෙඩ්කාර්වාදී ව්යාපාරයේ සංකේතය වන නිල් පැහැයයි.
දලිත් පසුබිම දිප්කේගේ දේශපාලනයට බලපෑ හැටි
දිප්කේ උපන්නේ මහාරාෂ්ට්රයේ ඖරංගබාද්හි දලිත් පවුලක. දලිත් කියන්නේ ඉන්දියාවේ සමාජීය වශයෙන් ගොඩක් කොන් වුණු ප්රජාවකට.
“මගේ තාත්තා ආවේ ගොඩක් දුප්පත් පසුබිමකින්. මගේ සීයා නිකම්ම නිකම් ගොවියෙක්,” කියලා මැයි මාසයේදී බොස්ටන්හි ඉඳන් දුරකථනයෙන් සම්බන්ධ වෙමින් දිප්කේ රොයිටර් සේවයට කිව්වා.
ඔහුගේ මේ කුල පසුබිම ඔහුගේ දේශපාලන අදහස්වලට ගොඩක් බලපෑවා.
ජූනි 6 වෙනිදා දිප්කේ දිල්ලියට ආවම, ඔහු බී.ආර්. අම්බෙඩ්කාර්ගේ “My Autobiography” (මගේ ආත්ම කථනය) පොත ඉහළට ඔසවලා පෙන්නුවා.
අම්බෙඩ්කාර් කියන්නේ දලිත් අයිතිවාසිකම් වෙනුවෙන් සටන් කරපු, ඉන්දියානු ආණ්ඩුක්රම ව්යවස්ථාව හදන්න මුල් වුණු නායකයෙක්. දිප්කේ මේ පොත ඔසවද්දී ආරක්ෂකයන් සහ පිරිස ඔහුව වටකරගෙන හිටියා.
2020 දී දිප්කේ, ‘ආම් ආද්මි’ පක්ෂයේ (AAP) සමාජ මාධ්ය කණ්ඩායමට එකතු වුණා.
හාස්යය සහ ඉන්ටර්නෙට් මේම්ස් (memes) භාවිත කරලා අදහස් ජනතාව අතරට ගෙනියන විදිහ ඔහු ඉගෙනගත්තේ එතැනින්.
දැනට ඔහුට ඒ පක්ෂය එක්ක නිල සම්බන්ධයක් නෑ. ඒත් ආම් ආද්මි පක්ෂය ඇතුළු විපක්ෂ ගණනාවක්ම මේ තරුණ විරෝධතාවට සහය දෙනවා.
2023 දී ඔහු මහජන සන්නිවේදනය පිළිබඳ පශ්චාත් උපාධියට ඇමෙරිකාවේ බොස්ටන් වෙත ගියා. ඒත් ඔහු ඉන්දියාවේ දේශපාලනය ගැන දිගටම අවධානයෙන් හිටියා.
තමන්ට ලැබුණු මේ හදිසි ජනප්රියතාවය ගැන තවමත් පුදුම වෙන බව දිප්කේ කියනවා.
උපහාසාත්මක වෙබ් අඩවියක් ජාතික ව්යාපාරයක් වුණු හැටි
දිල්ලියේ ඉන්න යූටියුබ්කරුවෙක් වන මේඝ්නාද් (Meghnad S.) තමයි දිප්කේගේ සටහන මුලින්ම ප්රසිද්ධ කළේ.
ඒ සටහන දැක්කට පස්සේ, මේඝ්නාද් සහ එයාගේ යාලුවෙක් එකතු වෙලා AI මෙවලම් භාවිත කරමින් ‘කොක්රෝච් ජනතා පක්ෂය’ නමින් උපහාසාත්මක වෙබ් අඩවියක් හැදුවා.
“මම ඒක දැක්කම මට හිතුණා ඒක මාරම විහිළුවක් කියලා,” මේඝ්නාද් කිව්වා.
ඊට අදාළ ඉන්ස්ටග්රෑම් පිටුවට දවස් කිහිපයකින් ෆලෝවර්ස්ලා (Followers) මිලියන 22 ක් එකතු වුණා. පස්සේ ඒක මිලියන 25 දක්වා වැඩි වුණා.
“ඒක හරිම ස්වාභාවිකව සිද්ධ වුණු දෙයක්,” මේඝ්නාද් කිව්වා.
කොහොම වුණත්, මේ ව්යාපාරය අන්තර්ජාලය පුරා පැතිරෙද්දී ඊට ආපු අවදානම සහ තර්ජනත් වැඩි වුණා.
මැයි මාසයේදී ඇමෙරිකාවේ ඉඳන් අදහස් දක්වමින් දිප්කේ කිව්වේ, මේක ඉන්දියාවේ දේශපාලන කතිකාවත වෙනස් කරන්න කරපු උත්සාහයක් කියලා.
“මේක ඉන්දියාවේ දේශපාලන සංවාදය වෙනස් කරන්න හදපු ව්යාපාරයක්. ඉන්දියාවේ තරුණ පරපුර ප්රධාන දේශපාලනයෙන් සම්පූර්ණයෙන්ම අයින් වෙලයි හිටියේ,” ඔහු කිව්වා.
තමන්ට සහ තමන්ගේ පවුලට තර්ජන ආවත්, දිප්කේ ආපසු ඉන්දියාවට ආවා. තරුණයන්ට සාධාරණය ඉෂ්ට වෙනකම් පස්සට යන්නේ නැහැ කියලා ඔහු පොරොන්දු වුණා.
ජූනි 6 වෙනිදා ඉඳන් පිරිස වැඩිවෙද්දී ඔහු විරෝධතාව තියෙන තැනම රැඳී සිටියා.
ඔහු පිරිස පාලනය කරන අයුරු, මාධ්යවේදීන්ට කතා කරන අයුරු හෝ විවේකයක් අරන් පොඩ්ඩක් නිදාගන්න අයුරු එතන ඉන්න අයට නිතරම පෙනෙන්න තිබුණා.
ඉන්දියාවේ Gen Z විරෝධතා දැන් සමාජ මාධ්ය විහිළුවකට විතරක් සීමා වෙලා නෑ. ඒක අධ්යාපනය, රැකියා සහ රජයේ වගවීම වෙනුවෙන් කෙරෙන ලොකු සටනක් බවට පත්වෙලා.
බදාදා වේදිකාවේ ඉඳන් කතා කරපු දිප්කේ තමන්ගේ අරමුණ පැහැදිලි කළා.
“මම එක දෙයක් පැහැදිලි කරන්නම්, අපි දිනනකම් මේක නවත්තන්නේ නැහැ.”
