ප්‍රංශය පුරා පැවති මහජන විරෝධතා අතරතුර ඇති වූ ගැටුම් හේතුවෙන් පුද්ගලයින් 1,300කට අධික සංඛ්‍යාවක් අත්අඩංගුවට ගෙන ඇති බව එරට බලධාරීන් පවසයි.
ජීවන වියදම ඉහළ යාම සහ පාසල්වල පවතින දුර්වල තත්ත්වයන්ට එරෙහිව මෙම විරෝධතා සංවිධානය කර තිබුණි.
මූලික වශයෙන් සාමකාමීව පැවති මෙම පෙළපාලිවලින් අනතුරුව, පැරිස් ඇතුළු නගර කිහිපයකදී විරෝධතාකරුවන් විසුරුවා හැරීම සඳහා පොලීසිය කඳුළු ගෑස් සහ ජල ප්‍රහාරක යන්ත්‍ර භාවිත කර ඇත.
මාර්සේයි (Marseille) නගරයේ බාධකවලට ගිනි තබා ඇති අතර, බෝඩෝ (Bordeaux) නගරයේදී පිරිසක් වෙළඳසැල්වල ලෑලි ගලවා විනාශ කර තිබේ.
පසුගිය සතියේ වාර්තා වූ මට්ටමේ දැවැන්ත කෝලාහල තත්ත්වයන් මෙවර වළක්වා ගැනීමට බලධාරීන් සමත්ව ඇත.
අභ්‍යන්තර අමාත්‍යාංශයට අනුව, ඊයේ (24) දින විරෝධතා සඳහා ඇස්තමේන්තුගත ජනකායක් වන 410,000ක් පමණ සහභාගී වී ඇති අතර, වෘත්තීය සමිති ප්‍රකාශ කර ඇත්තේ එම සංඛ්‍යාව 800,000ක් පමණ වන බවය.
පෙළපාලි පාලනය කිරීම සඳහා ආරක්ෂක අංශ සාමාජිකයින් 70,000ක් පමණ යොදවා තිබූ අතර, නගර කිහිපයක දැඩි සීමා පැනවීමටද කටයුතු කර තිබුණි.
කෙසේ වෙතත්, රට පුරා ඇති වූ ගැටුම්වලින් පොලිස් නිලධාරීන් 53 දෙනෙකු තුවාල ලබා ඇති බව අභ්‍යන්තර අමාත්‍යාංශය තහවුරු කරයි.
ප්‍රංශ ජනාධිපති එමානුවෙල් මැක්‍රෝන් මීට පෙර නියෝග කර තිබුණේ පිළිගත් වෘත්තීය සමිති මඟින් සංවිධානය කරනු ලබන පෙළපාලි සඳහා පමණක් අවසර ලබා දෙන බවය.
දේපළවලට අලාභහානි සිදු කිරීම, ගිනි තැබීම් සහ කොල්ලකෑම් සම්බන්ධයෙන් මේ වන විට පුද්ගලයින් සිය ගණනක් ක්ෂණික අධිකරණ විභාග හරහා සිරගත කර තිබේ.
මෙම නොසන්සුන්කාරී වාතාවරණය මධ්‍යයේ, ලබන වසරේ පැවැත්වීමට නියමිත ප්‍රංශ ජනාධිපතිවරණයට අදාළව දේශපාලන උණුසුමද ඉහළ ගොස් ඇති අතර, ප්‍රධාන දේශපාලන පක්ෂ නායකයින් වත්මන් අර්බුදය සම්බන්ධයෙන් ජනාධිපති මැක්‍රෝන්ට දෝෂාරෝපණය එල්ල කරමින් සිටිති.
