
2025 වසරේ අයවැය මගින් ඉදිරිපත් කළ ප්රධාන යෝජනාවලින් සියයට 33ක් සම්පූර්ණයෙන් ක්රියාත්මක කර ඇති බව වෙරිටේ රිසර්ච් (Verité Research) ආයතනයේ නවතම අයවැය පොරොන්දු ඇගයීමෙන් අනාවරණය වී තිබේ.
2017 වසරේ සිට සිදුකරන ලද වාර්ෂික ඇගයීම් සැලකීමේදී වසරක් තුළ වාර්තා වූ ඉහළම සම්පූර්ණ කිරීමේ ප්රතිශතය මෙය බව එම ආයතනය පෙන්වා දෙයි.
වෙරිටේ රිසර්ච් ආයතනයේ “අයවැය පොරොන්දු: මැති සබයෙන් ඔබ්බට” ඇගයීම යටතේ 2025 අයවැයෙන් ඉදිරිපත් කළ රුපියල් මිලියන 500 ඉක්මවන වටිනාකමකින් යුත් ප්රධාන යෝජනා 36ක් නිරීක්ෂණයට ලක්කර තිබේ.
එම යෝජනා සඳහා වෙන්කර ඇති සමස්ත මුදල රුපියල් බිලියන 212කට ආසන්න බව සඳහන් වේ.

අයවැය යෝජනා ක්රියාත්මක කිරීමේ කැපී පෙනෙන වර්ධනයක්
මෙම ඇගයීමට අනුව ප්රධාන අයවැය යෝජනා 36න් තුනෙන් එකක් සම්පූර්ණයෙන් ක්රියාත්මක කර අවසන් කර තිබේ.
2024 වසරේදී අයවැය යෝජනා සම්පූර්ණ කිරීමේ ප්රතිශතය සියයට 17ක් වූ අතර, 2025 වසරේදී එය සියයට 33ක් දක්වා ඉහළ ගොස් ඇත.
විශේෂත්වය වන්නේ 2025 වසරේ අයවැය ඉදිරිපත් කරනු ලැබුවේ එම වසරේ පෙබරවාරි මාසයේදී වීමයි.
ඒ අනුව අයවැය යෝජනා ක්රියාත්මක කිරීමට සාමාන්ය වසරකට සාපේක්ෂව අඩු කාලයක් හිමිව තිබියදීත් මෙම ප්රගතිය වාර්තා වී තිබීම කැපී පෙනේ.
එමෙන්ම අයවැය යෝජනා 15ක්, එනම් සමස්ත යෝජනාවලින් සියයට 41ක් සම්පූර්ණයෙන් ක්රියාත්මක කර හෝ සතුටුදායක ප්රගතියක් අත්කරගෙන ඇති බවද ඇගයීමෙන් පෙන්වා දී ඇත.
අයවැය පොරොන්දුවලින් 40%කට ආසන්න ප්රමාණයක් තවමත් පසුබසී
කෙසේ වෙතත්, අයවැය යෝජනා ක්රියාත්මක කිරීමේ ප්රගතිය ඉහළ ගොස් තිබුණද සැලකිය යුතු යෝජනා ප්රමාණයක් තවමත් අපේක්ෂිත මට්ටමට ළඟා වී නොමැති බව වාර්තාව අනාවරණය කරයි.
ඒ අනුව ප්රධාන අයවැය යෝජනා 36න් යෝජනා 14ක්, එනම් සියයට 40කට ආසන්න ප්රමාණයක් සැලකිය යුතු මට්ටමකින් ක්රියාත්මක කර නොමැත.
තවත් යෝජනා 7ක ප්රගතිය පිළිබඳව ප්රමාණවත් තොරතුරු නොමැති බැවින් ඒවායේ ක්රියාත්මක වීමේ තත්ත්වය නිශ්චිතව තක්සේරු කිරීමට නොහැකි වී තිබේ.
එම යෝජනා සමස්තයෙන් සියයට 19ක් නියෝජනය කරන අතර, ඒවා “හෙළි කර නැත” යන කාණ්ඩය යටතේ වර්ගීකරණය කර ඇත.
මෙම තත්ත්වය අනුව අයවැය යෝජනා ක්රියාත්මක කිරීමේ ප්රගතියක් දක්නට ලැබුණද, ඇතැම් යෝජනා සම්බන්ධයෙන් තවදුරටත් අවධානය යොමු කළ යුතු බව පැහැදිලි වේ.
රාජ්ය තොරතුරු හෙළිදරව් කිරීමේ විනිවිදභාවයත් ඉහළට
මේ අතර රාජ්ය අයවැය යෝජනා සම්බන්ධ තොරතුරු ජනතාවට ලබාදීමේ විනිවිදභාවයද 2025 වසරේදී සැලකිය යුතු ලෙස වර්ධනය වී ඇති බව වෙරිටේ රිසර්ච් ආයතනය පෙන්වා දෙයි.
ඇගයීමට ලක්කළ අයවැය යෝජනාවලින් සියයට 64ක් තොරතුරු හෙළිදරව් කිරීම අතින් “සම්පූර්ණයෙන්ම විවෘත” කාණ්ඩයට ඇතුළත් වී තිබේ.
විශේෂයෙන් 2017 වසරෙන් පසු පළමු වතාවට කිසිදු අයවැය යෝජනාවක් තොරතුරු ලබාදීමේදී “සංවෘත” හෙවත් Closed කාණ්ඩයට ඇතුළත් නොවීමද මෙවර ඇගයීමේ විශේෂත්වයකි.
රාජ්ය ආයතන සහ නිලධාරීන් අයවැය යෝජනාවල ප්රගතිය පිළිබඳ තොරතුරු ලබාදීමට දක්වන විවෘතභාවය ඉහළ යාම, රාජ්ය මූල්ය කළමනාකරණයේ වගවීම සහ විනිවිදභාවය ශක්තිමත් කිරීම සඳහා වැදගත් පියවරක් ලෙස සැලකිය හැකිය.
පොරොන්දු ඉටු කිරීමේ ප්රගතියක් – ඉතිරි යෝජනා ගැනත් අවධානය අවශ්යයි
2025 අයවැය සම්බන්ධයෙන් වෙරිටේ රිසර්ච් ආයතනය සිදුකළ මෙම ඇගයීමෙන් අයවැය පොරොන්දු ක්රියාත්මක කිරීමේ සාර්ථකත්වය සහ තවදුරටත් පවතින අභියෝග යන දෙකම අනාවරණය වේ.
එක් අතකින් 2017 වසරෙන් පසු ඉහළම සම්පූර්ණ කිරීමේ ප්රතිශතය වාර්තා වී ඇති අතර, අනෙක් අතට ප්රධාන යෝජනාවලින් සියයට 40කට ආසන්න ප්රමාණයක් තවමත් සැලකිය යුතු ප්රගතියක් අත්කරගෙන නොමැත.
එමෙන්ම තොරතුරු හෙළිදරව් කිරීමේ විනිවිදභාවය ඉහළ යාමද මෙවර අයවැය ඇගයීමේ ධනාත්මක ලක්ෂණයක් වී තිබේ.
ඒ අනුව ඉදිරි අයවැය ක්රියාත්මක කිරීමේදී යෝජනා සඳහා මුදල් වෙන්කිරීමට අමතරව, ඒවා නියමිත කාලය තුළ ජනතාවට ප්රතිලාභ ලැබෙන ආකාරයෙන් ක්රියාත්මක කිරීම සහ ප්රගතිය පිළිබඳ තොරතුරු විවෘතව ලබාදීම වැදගත් වනු ඇත.





