බොදු බල සේනා සංවිධානයේ මහලේකම් පූජ්ය ගලගොඩඅත්තේ ඥානසාර හිමියන් වෙත 2019 වසරේදී ලබාදුන් ජනාධිපති සමාව ශ්රේෂ්ඨාධිකරණය මගින් අහෝසි කිරීමෙන් අනතුරුව, උන්වහන්සේ මේ වන විට අතුරුදන්ව ඇති බවට වාර්තා වන බව Sunday Island පුවත්පත වාර්තා කරයි.
නියමිත වසර හයක සිරදඬුවමෙන් ඉතිරි කොටස ගෙවීම සඳහා උන්වහන්සේ නැවත බන්ධනාගාරගත කිරීමට අවශ්ය පියවර ගැනීම පිණිස බන්ධනාගාර නිලධාරීන් රාජගිරිය නාවල පිහිටි උන්වහන්සේගේ විහාරස්ථානය වෙත ගොස් ඇති බව එම පුවත්පත සඳහන් කරයි.
කෙසේ වෙතත්, ඥානසාර හිමියන් මේ වන විට වැඩවසන ස්ථානයක් පිළිබඳව තමන් නොදන්නා බව විහාරස්ථානයේ වැඩසිටින සෙසු හිමිවරුන් බන්ධනාගාර නිලධාරීන්ට ප්රකාශ කර තිබේ.
2019 වසරේදී ඥානසාර හිමියන් වෙත එවක ජනාධිපති මෛත්රීපාල සිරිසේන මහතා විසින් ලබාදුන් විශේෂ ජනාධිපති සමාව බලරහිත සහ අත්තනෝමතික තීරණයක් බවට තීන්දු කළ ශ්රේෂ්ඨාධිකරණය, එමගින් මහජන විශ්වාසය සහ ස්වාභාවික යුක්තියේ මූලධර්ම උල්ලංඝනය වී ඇති බවට පසුගියදා තීන්දු කළේය.
අධිකරණයට අපහාස කිරීමේ චෝදනාව මත වසර හයක සිරදඬුවම් නියමව සිටි උන්වහන්සේ, ඉන් මාස නවයක පමණ කාලයක් සිරගතව සිටියදී 2019 මැයි මාසයේදී මෙම ජනාධිපති සමාව ලබා නිදහස ලැබූහ. ශ්රේෂ්ඨාධිකරණ තීන්දුවත් සමඟ අදාළ නීතිමය සහ බන්ධනාගාර රෙගුලාසිවලට යටත්ව උන්වහන්සේට සිය සිරදඬුවමේ ඉතිරි කාලය ගෙවීමට සිදුව ඇත.
