ආණ්ඩුව හිතනව නම් විපක්ෂය මර්දනය කරලා මහා සංඝරත්නය මර්දනය කරලා මේ රටේ සංස්කෘතිය විනාශ කරලා ඩයස්පෝරාවට ඕන විදියට තමන්ගේ ප්රතිපත්ති තීන්දු තීරණ අරගෙන මැතිවරණයක් ජයග්රහණය කරන්න පුළුවන් කියලා ආණ්ඩුව වැරදියි. ඕනෑම වෙලාවක ඕනෑම මැතිවරණයකට අපි සූදානම්. ආණ්ඩුවට කයිවාරු ගහලා දඟලන්න දෙයක් නෑනේ අපිට බැන බැන ඉන් නැතුව අර ප්රාදේශීය සභා මැතිවරණය තිබ්බ වගේ පළාත් සභා මැතිවරණ තිබ්බ නම් ඉවරයි. එතකොට පළාත් සභා මැතිවරණයේදී ජනතාවට ලැබෙයි තමන්ගේ මනාපය ප්රකාශ කරන්න. එතකොට බලන්න පුළුවන් ආණ්ඩුව ඉන්න තැන යැයි ශ්රී ලංකා පොදුජන පෙරමුණේ ජාතික සංවිධායක හා පාර්ලිමේන්තු මන්ත්රී නාමල් රාජපක්ෂ මහතා පැවසීය. ඒමහතා මේ බව ප්රකාශ කළේ මාධ්යවේදීන් නැගූ ප්රශ්න වලට පිළිතුරු දෙමිනි. මෙහිදී වැඩිදුරටත් අදහස් දැක්වූ නාමල් රාජපක්ෂ මහතා මෙසේද පැවසීය.
අපේ තරුණ සංවිධානය ලෝටස් මූමන්ට් එක හරහා මේ රටේ දේශපාලනික වශයෙන් අපේ කඳවුරත් එක්ක සම්බන්ධ සහ සිවිල් සමාජ එක්ක සම්බන්ධ තරුණ පිරිස් ඒකරාශි කරමින් ඉදිරි කාලසීමාව තුළින් එක පැත්තකින් පක්ෂ ගොඩනැගෙන්නෙ කොහොමද අද සහ ඔවුන්ගේ සිතුම් පැතුම් බලාපොරොත්තු සහ අවශ්යතාවයන් මේ රට ගොඩනගන්නෙ කොහොමද කියන ආකාරය පිළිබඳව අධ්යනයක් කරනවා. ඒ වගේම අපි දේශපාලනික වශයෙන් පෙළගැහෙන්න ලෝටස් මූමන්ට් එකේ එක අදියරක විශාල පිරිසක් සම්බන්ධ වෙනවා. ඉතින් ඒ අයගෙ අදහස් අපි හුවමාරු කර ගන්නවා. දැන් ඔය ලිපිගොනු ගැන අහන්න ඕනේ යහපාලන ආණ්ඩුව වෙලාවෙ සල්ලි අරන් බොරු කිව්වේ ඒ බොරු කියන්න ලියලා දීපු අයගෙන් තමයි ඉස්සරම අහන්න ඕන.
මොකද දැන් පහුගිය යහපාලන ආණ්ඩුවේ ප්රධාන ඇමැතිවරයෙක් අද ප්රසිද්ධියේ කියනවා ජේවීපී එකට සමහර සිවිල් සංවිධානවලටයි සල්ලි දුන්නා රාජපක්ෂලාට මඩ ගහන්න කියලා. හැබැයි ඒ කාලේ අපි දැක්කනේ ඩුබායි මැරියට් හෝටලේ ඉස්සරහට ගිහිල්ලා සෙල්ෆි වීඩියෝ දාපු අය හිටියනේ. ඉතින් ඒ අයගෙන් තමයි අහන්න ඕන. අපිට මතකයි මේ ආණ්ඩුවේ වර්තමාන ජනාධිපතිවරයා එදා කියනවා සමහර නිලධාරීන් ෆයිල් හංගගෙන හිටියා මේ ජනාධිපතිවරයාගේ බලයට පැමිණීම සහ ඔවුන්ගේ ආණ්ඩුවක් හදනකන් මේ පරීක්ෂණ කටයුතුවලට සාධාරණයක් කරන්න. ඒ පරීක්ෂණ කටයුතු සාර්ථකව කරන්න ඕන කියල. ඒ ෆයිල් හංගපු අයගෙන් තමයි අහන්න ඕන. අර කැබ් එක මතකයිනේ, ඒක පිටිපස්සේ ෆයිල් මිටි ගණන් ගෙනාවා. ඉතින් කැබ් එක එලවපු කෙනාගෙන් තමයි අහන්න වෙන්නේ මොකක්ද ෆයිල්වලට වුනේ කියලා. තමන් සල්ලිවලට බොරු කියලා ඒ බොරු ඇත්ත කරන්න මේ රටේ පොලිසිය පාවිච්චි කරනවා. දූෂණ මර්දන කමිටුවක් කියලා ඒ කාලේ දාලා ඒකේ හිටපු ලේකම් අද පොලිස් ඇමැති කරලා. උපරිම කඩේ යන පුද්ගලයෙක් පොලිස්පතිවරයා බවට පත් කරගෙන ඒ පොලිස්පතිවරයාට තමන්ගේම බොරු ටික ඔප්පු කරන්න කියලා බලපෑම් කරලා අද ඒක ඔප්පු කරගන්න බැරි වෙන කොට දැන් එක එක ඒවා මිසින් කියනවා.
මේ ආණ්ඩුවේ ක්රියා කලාපය බලන්නකෝ මහා සංඝරත්නයට සලකන විදිය,
ත්රිකුණාමලය ස්වාමීන්වහන්සේ බුදු පිළිම තැන්පත් කිරීම සම්බන්ධව එක වෙලාවක කිව්වා බුදු පිළිමය ආරක්ෂා කරන්න පොලිසියට වැඩමෙව්වා කියලා, බුදු පිළිමය ආරක්ෂා කරන්න ආපු හාමුදුරුවෝ රිමාන්ඩ් කරලා. මේක තමයි මේ අය මේ රටේ දේශපාලනික වශයෙන් බංකොළොත් වෙනකොට එක පැත්තකින් හාමුදුරුවන්ට අපහාස කරනවා. තව පැත්තකින් ආගමික නායකයන්ට අපහාස කරනවා. දේශපාලන පක්ෂ විවේචනය කරනවා. ඒ ඔක්කොම බැරිවෙලා ෆෙල් වේගෙන යන කොට දැන් ඊළඟට කියනවා ඉතින් මේ ෆයිල්වල මේක නැහැ කියලා. අරක නැහැ කියලා නහයෙන් අඩනවා. ඉතින් අර ජනාධිපතිතුමා කෙඳිරි ගන්න එපා කියලා තියෙන්නේ මේ අයටම තමයි.
