වත්මන් ඉන්ධන පෝලිම්වල රැඳී සිටින ජනතාව රජය කෙරෙහි වෛරයකින් තොරව, පවතින ලෝක තත්ත්වය පිළිබඳ මනා අවබෝධයකින් සහ සතුටින් පසුවන බව ‘සිවිල් බුද්ධි පෙරමුණ’ කැඳවුම්කරු සංජය මහවත්ත මහතා ප්රකාශ කරයි.
ඔහු සඳහන් කර සිටියේ, පෝලිම්වල සිටින ජනතාව ගෝලීය ආර්ථික අවපාතය, ගෝලීය යුද්ධය සහ බලශක්ති අර්බුදය පිළිබඳව මනා දැනීමක් ඇතිව එහි රැඳී සිටින බවය.
මේ හේතුවෙන් තෙල් සහ ගෑස් නැව් පැමිණීම ප්රමාද වන බව දන්නා ජනතාව ඉතාමත් සංයමයකින් යුතුව පෝලිම්වල රැඳී සිටින බවත්, ඔවුන් ඇතැම් විට බොහොම සතුටින් පෝලිම්වල රැඳී සිටින බවත් ඔහු පෙන්වා දෙයි.
මෙම අර්බුදය ශ්රී ලංකාවට පමණක් සීමා වූවක් නොවන බවත්, බ්රසීලය, මැලේසියාව සහ ඕස්ට්රේලියාව වැනි රටවල් 150කට අධික ප්රමාණයක මේ වන විටත් ඉන්ධන මිල ඉහළ ගොස් ඇති බවත් ඔහු පවසයි.
මෙය කොරෝනා වසංගතය මෙන් මුළු ලෝකයටම පොදු ගැටලුවක් බවත්, මෙවැනි තත්ත්වයක් තුළ ජනාධිපතිවරයාට හෝ බලශක්ති අමාත්යවරයාට පමණක් දොස් පැවරීම අසාධාරණ බවත් මහවත්ත මහතා අවධාරණය කළේය.
විපක්ෂයේ දේශපාලනඥයන් ජනතාව කුපිත කරවන අන්දමේ ප්රකාශ නිකුත් කරන බවට චෝදනා කළ ඔහු, ජනතාව දැන් එවැනි දේ පිළිගැනීමට සූදානම් නැති බව ද පවසා සිටියේය.
ලෝකයම ආර්ථික වශයෙන් ඇද වැටෙමින් පවතින මොහොතක වත්මන් රජය රට ගොඩනැගීමට ගෙන යන වැඩපිළිවෙළ අවබෝධ කරගෙන කටයුතු කළ යුතු බව ද ඔහු වැඩිදුරටත් ප්රකාශ කළේය.
