ලොව ඉහළම විලාසිතා සැණකෙළියේදී ඩොලර් මිලියන 50ක ඓතිහාසික දියමන්ති නිර්මාණයක් කරළියට එද්දී, ශ්‍රී ලාංකික නිරූපිකාවක තැබූ අද්විතීය වාර්තාවක් ජාත්‍යන්තරයේ දැඩි අවධානයට ලක්වෙයි.
ලොව පුරා විලාසිතා ක්ෂේත්‍රයේ ප්‍රමුඛතම සැණකෙළියක් වන ‘වික්ටෝරියාස් සීක්‍රට්’ වාර්ෂික විලාසිතා දැක්ම ලොස් ඇන්ජලීස් නුවරදී අතිඋත්කර්ෂවත් අයුරින් නිමාවට පත්විය. 1996 වසරේ සිට පැවත එන මෙම සම්ප්‍රදායික වේදිකාව මෙවර හැඩවූයේ මුළුමහත් ලෝකයේම විලාසිතා ලෝලීන්ගේ ඇස් අදහාගත නොහැකි වූ සුවිශේෂී ආභරණ නිර්මාණයකිනි.
සුපිරි ඇමෙරිකානු නිරූපිකා කයිලි ජෙනර් වේදිකාවට පිවිසියේ ඇමෙරිකානු ඩොලර් මිලියන 50ක් පමණ වටිනාකමකින් යුත් අතිශය දුර්ලභ දියමන්ති තිසර පටයකින් සැරසෙමිනි. විලාසිතා ඉතිහාසයේ මෙතෙක් නිර්මාණය වූ මිල අධිකම නිර්මාණයක් ලෙස මෙය ඉතිහාසයට එක්වන බව ක්ෂේත්‍රයේ විචාරකයෝ පෙන්වා දෙති.
කැරට් 75ක දුර්ලභ නිර්මාණ කෞශල්‍යය
සුප්‍රකට ජේකොබ් ඇන්ඩ් කොම්පැනි (Jacob & Co.) සමාගම විසින් මෙය නිර්මාණය කර ඇත්තේ වසර ගණනාවක ආභරණ කලාවේ තාක්ෂණය එක්තැන් කරමිනි. කැරට් 5 ත් 18 ත් අතර විශාලත්වයෙන් යුත් සුදු දියමන්ති 91ක් මෙන්ම, එහි හරි මැද දිස්වන කැරට් 75කට අධික කහ පැහැති මහා දියමන්තිය සමස්ත වේදිකාවම ඒකාලෝක කළේය.
මෙම විලාසිතා රාත්‍රිය ගීගී හඩිඩ්, බෙලා හඩිඩ්, අඩ්‍රියානා ලීමා, ඇලෙසැන්ඩ්‍රා ඇම්බ්‍රෝසියෝ ඇතුළු ලොව ප්‍රමුඛතම නිරූපිකාවන්ගෙන් විචිත්‍රවත් විය. ටේට් මැක්රේ සහ මේගන් ඩී ස්ටැලියන් ඇතුළු සංගීත ශිල්පීන්ගේ සජීවී දායකත්වය ඊට තවත් ප්‍රබෝධයක් එක්කළේය.
මෙවර විලාසිතා දැක්මේ සුවිශේෂීම සංධිස්ථානය සනිටුහන් වූයේ ශ්‍රී ලාංකික නාමය ජාත්‍යන්තරයට මුසුවීමෙනි. වෘත්තීය නිරූපණ ශිල්පිනී එලීනා ගුණවර්ධන වික්ටෝරියාස් සීක්‍රට් ඉතිහාසයේ එම වේදිකාව නියෝජනය කළ ප්‍රථම ශ්‍රී ලාංකික කාන්තාව බවට පත්වෙමින් නව පිටුවක් පෙරළුවාය.
දකුණු ආසියාතික නිරූපණ ක්ෂේත්‍රයට අලුත් බලාපොරොත්තුවක් එක්කරමින් එලීනා තැබූ මෙම පියවර, දේශීය නිර්මාණශීලී ප්‍රතිභාවට ගෝලීය තලයේ විවර වන නව අවකාශයන් මනාව සනිටුහන් කරන්නකි.
