2019 වසරේ ශ්‍රී ලංකාවේ පාස්කු ඉරිදා බෝම්බ ප්‍රහාරයට පිටුපසින් වූ ජාලය ගොඩනැගීමට පුද්ගලයින් 15 දෙනෙකු සහාය වූ ආකාරය පිළිබඳව කොළඹ මහාධිකරණ තීන්දුවක විස්තර කෙරේ.
ශ්‍රී ලංකාවේ දරුණුතම ත්‍රස්ත ප්‍රහාරය පිටුපස වසර ගණනාවක් පුරා විහිදුණු අන්තවාදීකරණය, සැපයුම් සූදානම් කිරීම්, ආයුධ පුහුණුව සහ සාමාන්‍ය නිවාස හා දුෂ්කර ස්ථාන සමූහ ඝාතන සඳහා මධ්‍යස්ථාන බවට පත් කළ රහසිගත ක්‍රියාකාරකම් ජාලයක් පැවතුණි.
2019 පාස්කු ඉරිදා බෝම්බ ප්‍රහාරයට අදාළව කොළඹ ත්‍රිපුද්ගල විශේෂ මහාධිකරණයක් සිය තීන්දුව ලබා දෙන විට, එම තීන්දුව මගින් මෙම කුමන්ත්‍රණය පිටුපස වූ යාන්ත්‍රණය පිළිබඳ පුළුල් විස්තරයක් ලබා දුන්නේය.
සාක්ෂිකරුවන් 547 දෙනෙකු සහ නඩු භාණ්ඩ 2,000 කට අධික ප්‍රමාණයක් සම්බන්ධ වූ විමර්ශනයකින් අනතුරුව, චෝදනා 23,000 කට අධික සංඛ්‍යාවක් ඇතුළත් අධිචෝදනා පත්‍රයක් යටතේ පුද්ගලයින් 15 දෙනෙකු වැරදිකරුවන් බවට අධිකරණය තීන්දු කළේය. සැලසුම් සහගත ප්‍රහාර සඳහා සූදානම් වීමට මෙම මෙහෙයුම් ජාලය දායක වූ ආකාරය එහිදී සවිස්තරාත්මකව දැක්විණි.
අන්තවාදීකරණයේ ව්‍යුහය
ක්‍රමානුකූලව දෘෂ්ටිවාදාත්මකව මොළ සේදීමක් (මතවාදයන් කාන්දු කිරීමක්) හරහා වසර කිහිපයක් පුරා මෙම කුමන්ත්‍රණය වර්ධනය විය.
ත්‍රස්තවාදය වැළැක්වීමේ පනත යටතේ මෙලෙස මතවාදයන් කාන්දු කිරීම සම්බන්ධයෙන් නිශ්චිත නෛතික අර්ථ දැක්වීමක් නොමැති බැවින්, බඳවා ගත් අය අතර අන්තවාදී අදහස් හිතාමතාම රෝපණය කිරීම පිළිබඳව විමර්ශනය කිරීමේදී අධිකරණය විසින් පිළිගත් නෛතික සහ වාග් විද්‍යාත්මක අර්ථ දැක්වීම් වෙත යොමු විය.
2018 වසර පුරාම ශාන්තිපුර, හම්බන්තොට, මහනුවර සහ මාවනැල්ල ඇතුළු ප්‍රදේශවල නිවාඩු නිකේතන, මුස්ලිම් පල්ලි සහ වෙනත් ස්ථානවල රහසිගත රැස්වීම් සහ පුහුණු සැසි පවත්වන ලදී.
සහරාන් හෂීම් සහ මොහොමඩ් ඊබ්‍රාහිම් මොහොමඩ් නවුෆර් ඇතුළු අන්තවාදී පුද්ගලයින්ගේ බලපෑම යටතේ, ඊට සහභාගී වූවන් ඉස්ලාමීය රාජ්‍ය (IS) සංවිධානයේ ප්‍රචාරණ කටයුතු, පක්ෂපාතීත්වයේ දිවුරුම් සහ ප්‍රචණ්ඩකාරී ජිහාඩ් ප්‍රවර්ධනය කරන ඉගැන්වීම්වලට යොමු කර තිබුණි.
මෙම නඩු විභාගයේදී ඉදිරිපත් වූ සාක්ෂි මගින් අනාවරණය වූයේ බඳවා ගත් ඇතැමුන් ආයුධ පුහුණුව ද ලබා ඇති බවයි.
ශාන්තිපුර ප්‍රදේශයේ හුදකලා ස්ථානයකදී, ටී-56 ගිනිඅවි සහ මිලිමීටර් 9 පිස්තෝල හැසිරවීම, ඉලක්ක ගැනීම මෙන්ම ගිනිඅවි ගැලවීම සහ නැවත සවි කිරීම පිළිබඳව සහභාගී වූවන්ට උපදෙස් ලබා දී ඇති බව වාර්තා වේ.
මෙහෙයුම් පෙරහුරු
මෙම මතවාදාත්මක සූදානම සමඟම එන්න එන්නම භයානක මෙහෙයුම් ක්‍රියාකාරකම් ද ක්‍රියාත්මක විය.
පාස්කු ඉරිදා ප්‍රහාරයට මාස අටකට පමණ පෙර කාත්තන්කුඩි ප්‍රදේශයේ සිදු වූ පිපිරීමකින් සහරාන්ගේ සහෝදරයා වන මොහොමඩ් කාසිම් මොහොමඩ් රිල්වාන්ගේ දෑත්වලට සහ ඇස්වලට බරපතල තුවාල සිදුවිය.
ඔහුට තුවාල සිදුවූ ආකාරය වසන් කිරීමට කණ්ඩායමේ සාමාජිකයින් උත්සාහ කළ බව අධිකරණයට ඉදිරිපත් වූ සාක්ෂිවලින් හෙළි විය.
රිල්වාන් ව්‍යාජ නමක් යටතේ කොළඹ ජාතික රෝහලට රැගෙන ගොස් ඇති අතර, රෝහල් කාර්ය මණ්ඩලයට වැරදි පුද්ගලික තොරතුරු ලබා දී ඔහුගේ තුවාල ගෑස් සිලින්ඩරයක් පිපිරීමක් හේතුවෙන් සිදුවූවක් බව ප්‍රකාශ කර ඇත.
එම කාලය තුළදීම, මෙම ජාලයේ සාමාජිකයින් ස්ථාන කිහිපයක පුපුරණ ද්‍රව්‍ය ගබඩා කරමින් සිටි බවට ද චෝදනා එල්ල විය.
පසුව විමර්ශකයින් විසින් සඟවා තිබූ ස්ථානවලින් RDX, TNT, විදුලි පරිපථ සහ වයර් කොටස් සොයා ගන්නා ලදී.
සැලසුම් සහගත පාස්කු ඉරිදා බෝම්බ ප්‍රහාරයට දින පහකට පෙර, ඔවුන් සිය උපාංග තවදුරටත් අත්හදා බලමින් නවීකරණය කරන ලද යතුරුපැදියක් යොදාගෙන තවත් පරීක්ෂණ පිපිරීමක් සිදු කර ඇති බව වාර්තා වේ.
පුපුරණ ද්‍රව්‍ය සහ ආරක්ෂිත නිවාස
මෙම කුමන්ත්‍රණය සඳහා විශාල පුපුරණ ද්‍රව්‍ය තොග, රසායනික ද්‍රව්‍ය, ගබඩා ස්ථාන සහ ආරක්ෂිත නිවාස වෙත ප්‍රවේශය අවශ්‍ය විය.
පිපිරුම් ස්ථාන සහ නොපිපිරුණු ද්‍රව්‍ය පරීක්ෂා කළ රජයේ රස පරීක්ෂකවරුන් විසින් කළුගල් කැඩීම සඳහා යොදාගන්නා වෝටර්-ජෙල් (water-gel) පුපුරණ ද්‍රව්‍ය සහ යූරියා නයිට්‍රේට් මිශ්‍රණය බෝම්බ සඳහා යොදාගත් ප්‍රධාන සංරචක ලෙස හඳුනාගෙන ඇති බව වාර්තා වේ.
ඉදිකිරීම් හෝ ගල් කොරි කටයුතු සඳහා යැයි පවසමින් ව්‍යාජ හේතු දක්වා මෙම පුද්ගලයින් විසින් වෝටර්-ජෙල් කාට්රිජ් සහ ඩෙටනේටර් විශාල ප්‍රමාණයක් ලබාගෙන ඇති බවට විමර්ශකයින් චෝදනා කළහ.
එසේම මෙම ජාලය විසින් පානදුරේ සිට දළුවකොටුව දක්වා ආරක්ෂිත නිවාස සහ ගබඩා ස්ථාන කිහිපයක්ම ස්ථාපිත කර තිබුණි.
ප්‍රහාරයට සම්බන්ධ පුද්ගලයින් විසින් මාස කිහිපයකට පෙර කුලියට ගෙන තිබූ බව කියන පානදුරේ පිහිටි නිවසකින් යකඩ බෝල, රසායනික අපද්‍රව්‍ය සහ සමහර මරාගෙන මැරෙන බෝම්බකරුවන් විසින් හෝටල් සහ පල්ලි වෙත රැගෙන ගිය බෑග්වලට සමාන බෑග් අධිකරණ වෛද්‍ය විමර්ශකයින් විසින් සොයා ගන්නා ලදී.
මෙම ස්ථානවලට අදාළ පුද්ගලයින් සම්බන්ධ බව තහවුරු කිරීම සඳහා පැමිණිල්ල විසින් ඇඟිලි සලකුණු සාක්ෂි ද ඉදිරිපත් කරන ලදී.
තීන්දුව සහ දඬුවම්
මෙම පුළුල් කුමන්ත්‍රණයට ඔවුන් සෘජුවම සම්බන්ධ බවට ප්‍රමාණවත් ස්වාධීන සාක්ෂි නොමැති බවට අධිකරණය නිගමනය කිරීමෙන් පසු තවත් විත්තිකරුවන් නම දෙනෙකු නිදොස් කොට නිදහස් කරන ලදී.
වැරදිකරුවන් වූ පුද්ගලයින් 15 දෙනාට වසර 200 සිට 260 දක්වා වූ දීර්ඝ සිරදඬුවම් නියම කෙරිණි.
මෙම දඬුවම්වලට අමතරව, අන්තවාදීකරණය, ආයුධ පුහුණුව, පුපුරණ ද්‍රව්‍ය ලබා ගැනීම, ආරක්ෂිත නිවාස, ව්‍යාජ හැඳුනුම්පත් සහ සැපයුම් ජාලයන් 2019 අප්‍රේල් 21 වන දින පාස්කු ඉරිදා ප්‍රහාරයට දායක වූ ආකාරය පිළිබඳ පුළුල් අධිකරණ වාර්තාවක් මෙම තීන්දුව මගින් සපයනු ලබයි.
