එක්සත් ජාතීන්ගේ ළමා අරමුදල (UNICEF) විසින් සිදු කරන ලද නවතම අධ්යයනයකට අනුව, රටවල් 21ක අන්තර්ජාලය භාවිතා කරන ළමුන් මිලියන 20කට ආසන්න සංඛ්යාවක් වසරක් ඇතුළත ඩිජිටල් අවකාශය හරහා ලිංගික අපයෝජනයට ලක්ව ඇති බව අනාවරණය වේ.
ආසියාව, අප්රිකාව, ලතින් අමෙරිකාව සහ නැගෙනහිර යුරෝපය කේන්ද්ර කරගනිමින් වයස අවුරුදු 12-17 අතර ළමුන් ඇසුරින් සිදුකළ මෙම පර්යේෂණයට අනුව, අන්තර්ජාලය භාවිතා කරන ළමුන් 5 දෙනෙකුගෙන් එක් අයෙකුම පසුගිය වසර තුළ කිසියම් හෝ ලිංගික හිංසනයකට මුහුණ දී ඇත.
අපයෝජනයේ ස්වරූපය: ළමුන් මිලියන 15කට පමණ බලහත්කාරයෙන් අනවශ්ය ලිංගික අන්තර්ගතයන් පෙන්වා ඇති අතර, මිලියන 9කට ලිංගික සංවාද හා ඡායාරූප හුවමාරුව සඳහා බලපෑම් එල්ල වී තිබේ. තවත් ළමුන් මිලියන 4කගේ පෞද්ගලික ලිංගික ඡායාරූප ඔවුන්ගේ අනුමැතියකින් තොරව අන්තර්ජාලයට මුදාහැර ඇත.
සිදුවීම් සිදුවූ මාධ්යයන්: වාර්තා වූ අපයෝජනයන්ගෙන් 60%කට ආසන්න ප්රමාණයක් Facebook, WhatsApp, Instagram, Snapchat සහ TikTok වැනි ජනප්රිය සමාජ මාධ්ය හරහා සිදුවී ඇති අතර, 14%ක් අන්තර්ජාල ක්රීඩා (Online Games) ඇසුරින් සිදුවී ඇත.
අපයෝජකයන්ගේ හඳුනාගැනීම: මෙම සිදුවීම්වලින් අඩකටත් වඩා වැඩි ප්රමාණයකට වගකිව යුත්තේ ළමයා කලින් හඳුනන පුද්ගලයන්ය. තවත් 38%කදී අපයෝජකයා සහ ළමයා අතර මුල්ම හඳුනාගැනීම සිදුව ඇත්තේ අන්තර්ජාලය හරහාය.
කෘත්රිම බුද්ධිය (AI) සහ මානසික බලපෑම
දත්ත රැස්කළ රටවල් 9ක ළමුන් මිලියන 1.1ක් වාර්තා කර ඇත්තේ කෘත්රිම බුද්ධිය (AI) භාවිතයෙන් සකස් කළ තමන්ගේ ලිංගික දර්ශන හෝ ඡායාරූප අන්තර්ජාලයේ ඇති බවයි. මෙලෙස තාක්ෂණික ලෙස සූරාකෑමට ලක්වන ළමුන් අතර සියදිවි නසාගැනීමේ හෝ තමන්ටම හානි කරගැනීමේ ප්රවණතාව අනෙකුත් ළමුන්ට වඩා සිව් ගුණයකින් ඉහළ බව UNICEF පෙන්වා දෙයි.
මෙතරම් බරපතල තත්ත්වයක් පැවතුණද, සිදුවීම්වලින් 1%කටත් වඩා අඩු ප්රමාණයක් පමණක් පොලීසියට හෝ උපකාරක සේවාවන්ට වාර්තා වී තිබීම කණගාටුදායකය.
2020 සිට 2025 දක්වා කාලය තුළ ළමුන් 21,000ක් ආවරණය කරමින් සිදුකළ මෙම පර්යේෂණය, ක්ෂේත්රයේ සිදුකළ විශාලතම අධ්යයනයකි. මේ හේතුවෙන් ළමා ආරක්ෂණ නීති යාවත්කාලීන කරන ලෙසත්, වාර්තා කිරීමේ පද්ධති මෙන්ම තාක්ෂණික සමාගම්වල වගවීම ශක්තිමත් කරන ලෙසත් UNICEF රජයන්ගෙන් ඉල්ලා සිටියි.
