ඉරානය සහ ඊශ්රායලය අතර ගැටුම ආරම්භ වීමෙන් පසු ඉරානයේ උත්තරීතර නායක අයතුල්ලා අලි කමේනි පළමු වරට ප්රසිද්ධියේ පෙනී සිටි බව ඉරාන රාජ්ය මාධ්ය වාර්තා කරයි.
ෂියා මුස්ලිම්වරුන්ගේ උත්සවයක් වන අෂුරා උත්සවයට දිනකට පෙර පැවති උත්සවයක් අතරතුර ඔහු සෙනසුරාදා මුස්ලිම් පල්ලියක බැතිමතුන්ට ආශිර්වාද කරන ආකාරය රාජ්ය රූපවාහිනිය ඔස්සේ විකාශය කළ දර්ශනවල දැක්විණි.
ජූනි 13 වන දින ආරම්භ වූ සහ ඉරානයේ ඉහළ පෙළේ අණ දෙන නිලධාරීන් හා න්යෂ්ටික විද්යාඥයින් ඝාතනය කරන ලද දින 12ක යුද්ධය අවසන් කළ සටන් විරාමයෙන් පසු, කමේනි අවසන් වරට ප්රසිද්ධියේ පෙනී සිටියේ පටිගත කර විකාශනය කරන ලද ප්රකාශයකදී ය.
ඊශ්රායලය ඉරානයේ න්යෂ්ටික සහ හමුදා ස්ථාන වෙත හදිසි ප්රහාරයක් එල්ල කළ අතර, පසුව ඉරානය ඊශ්රායලය ඉලක්ක කර ගනිමින් ගුවන් ප්රහාර එල්ල කළේ ය.
ඊශ්රායලය සමග දින 12ක යුද්ධය අතරතුර, කමේනි වීඩියෝ පණිවිඩ තුනකින් නිකුත් කරමින් රූපවාහිනියේ පෙනී සිටි අතර ඔහු බංකරයක සැඟවී සිටින බවට අනුමාන කෙරිණි.
ඊශ්රායලය සමග සටන් විරාමයකට එකඟ වීමෙන් දින දෙකකට පසු ජූනි 26 වන දින, ඔහු “ජයග්රහණය” ප්රකාශ කරන වීඩියෝවක් නිකුත් කළ අතර ඉරාන න්යෂ්ටික මධ්යස්ථානවලට එල්ල කළ ප්රහාරවලින් එක්සත් ජනපදය “කිසිදු ජයග්රහණයක් නොලැබූ” බව එහිදී පැවසීය.
ඉරානයේ න්යෂ්ටික මධ්යස්ථාන “මුළුමනින් ම විනාශ කර” ඇති බවත්, තමා ඉරාන උත්තරීතර නායකයා “ඉතා කුරිරු සහ නින්දිත මරණයකින්” බේරා ගත් බව ත් පවසමින්, ඇමෙරිකානු ජනාධිපති ඩොනල්ඩ් ට්රම්ප් චෝදනා කළේ, කමේනි අසත්ය ප්රකාශ කරන බවටයි.
ඉරාන මාධ්ය තුළ කමේනි ප්රසිද්ධියේ පෙනී සිටි අවස්ථාව ආවරණය සඳහා ප්රධාන තැනක් ලබා දී තිබූ අතර, රූපවාහිනියෙන් ඔහුව දැකීමෙන් ආධාරකරුවන් ප්රීතිය ප්රකාශ කරන ආකාරය ද දර්ශනවල දැක්විණි.
කමේනි විසින් “ඕ ඉරානය, ජාතික ගීය ගායනා කරන්න” යනුවෙන් ජ්යෙෂ්ඨ පූජක මහමුද් කරිමිව දිරිමත් කරන අයුරුද දක්නට ලැබිණි.
ඊශ්රායලය සමග මෑත කාලීන ගැටුමේදී මෙම දේශප්රේමී ගීතය විශේෂයෙන් ජනප්රිය විය.
ඉස්ලාමීය ජනරජයේ නිර්මාතෘවරයාගේ නමින් නම් කරන ලද ටෙහෙරානයේ ඉමාම් කොමේනි පල්ලියේදී මෙම වීඩියෝ දර්ශන රූගත කර ඇති බව රාජ්ය රූපවාහිනිය පැවසීය.
ඉරාන රූපවාහිනිය ජනතාවට ආරාධනා කර ඇත්තේ කමේනි නැවත ප්රසිද්ධියේ පෙනී සිටීම පිළිබඳව ඔවුන්ගේ ප්රතිචාර ඇතුළත් වීඩියෝ පටිගත කර එවන ලෙසයි.
කමේනි ප්රසිද්ධියේ පෙනී සිටීම සිදුවන්නේ, ප්රධාන වශයෙන් ෂියා මුස්ලිම්වරුන් බහුතරයක් වෙසෙන ඉරානයේ මුහර්රම් මාසයේ ශෝක කාලයක් පවත්වන අතර ඊට සාම්ප්රදායිකව උත්තරීතර නායකයා සහභාගී වන බැවිනි.
මෙම වසරේ ජූලි 6 වන දිනට යෙදෙනු මුහර්රම් මාසයේ 10 වන දින අෂුරා උත්සවය පවත්වනු ලබන අතර, එම කාලය තුළ ෂියා මුස්ලිම්වරු මුහම්මද් නබිතුමාගේ මුනුබුරා වන හුසේන්ගේ අභාවය සිහිපත් කරති.
ජූනි 22 වන දින ඉරාන න්යෂ්ටික මධ්යස්ථානවලට ප්රහාර එල්ල කරමින් ඇමෙරිකා එක්සත් ජනපදය ද යුද්ධයට එක් විය.
මෙම මෙහෙයුමට ඇමෙරිකානු හමුදා ගුවන් යානා 125ක් සම්බන්ධ වූ අතර ෆෝඩෝ, නටාන්ස් සහ ඉස්ෆහාන් යන න්යෂ්ටික මධ්යස්ථාන තුන ඉලක්ක කර ගත්හ.
දින 12ක යුද්ධයේදී 900කට අධික පිරිසක් මිය ගිය බව ඉරාන අධිකරණ බලධාරීහු පැවසූහ.
උපුටා ගැනීම – BBC සිංහල
