රජයට අයත් වාහන සිය කාර්ය මණ්ඩලය වෙත වෙන්කර ඇති ආකාරය පිළිබඳ තොරතුරු ප්රසිද්ධ කිරීමට ජනාධිපති ලේකම් කාර්යාලය පසුගියදා තොරතුරු දැනගැනීමේ අයිතිවාසිකම පිළිබඳ කොමිෂන් සභාව හමුවේ එකඟතාව පළ කර ඇත.
ඒ අනුව, වාහන පරිහරණය කරන නිලධාරීන්ගේ නම්, තනතුරු මෙන්ම එම වාහනවල වර්ගය, මාදිලිය සහ ලියාපදිංචි අංක ඇතුළත් තොරතුරු නිකුත් කිරීමට නියමිතය.
මාධ්යවේදී රාහුල් සමන්ත හෙට්ටිආරච්චි මහතා විසින් පසුගිය වසරේ ජූලි මාසයේදී ඉදිරිපත් කරන ලද තොරතුරු දැනගැනීමේ අයදුම්පතකට අදාළව මෙම තීරණය ගෙන ඇත.
මීට පෙර එම තොරතුරු ලබාදීම ජනාධිපති ලේකම් කාර්යාලය විසින් ප්රතික්ෂේප කර තිබුණේ එය පෞද්ගලික තොරතුරු (තොරතුරු දැනගැනීමේ පනතේ 5 (1)(අ) වගන්තිය) යටතට වැටෙන බව පවසමිනි.
කෙසේ වෙතත්, කොමිෂන් සභාව තීන්දු කළේ රාජ්ය වාහන වෙන්කිරීමේ තොරතුරු පෞද්ගලික තොරතුරු ලෙස සැලකිය නොහැකි බවත්, මහජන උනන්දුවක් පවතින බැවින් එම තොරතුරු 2026 ජනවාරි 31 දිනට පෙර ලබාදිය යුතු බවත්ය.
එමෙන්ම, හිටපු ජනාධිපති රනිල් වික්රමසිංහ මහතාගේ ධුර කාලය අවසන් වීමෙන් පසු, 2024 සැප්තැම්බර් 23 දින පමණ භාරදුන් වාහන නැවත වෙනත් අමාත්යාංශ සහ ආයතන වෙත වෙන් කිරීමේ තොරතුරු ද නිකුත් කරන ලෙස කොමිෂන් සභාව නියෝග කළේය.
