දෙවුන්දර උපුල්වන් ශ්රී විෂ්ණු මහා දේවාලයේ වාර්ෂික ඇසළ පෙරහැර මංගල්යයට සහභාගී වීමට පැමිණි කාවඩි නර්තන කණ්ඩායම් කිහිපයක සාමාජිකයන් පිරිසක් මත්ද්රව්ය සමඟ අත්අඩංගුවට ගත් බව පොලිසිය පවසයි.
පෙරහැර මංගල්යයේ ආරක්ෂාව සහ විනය තහවුරු කිරීම සඳහා පොලිසිය ක්රියාත්මක කළ විශේෂ මෙහෙයුමකදී මෙම පිරිස අත්අඩංගුවට ගෙන ඇති අතර, පෙරහැරට සහභාගී වන සියලුම කාවඩි කණ්ඩායම්වල සාමාජිකයන් ක්ෂණික මත්ද්රව්ය පරීක්ෂණවලට ලක් කිරීමට ද ආරක්ෂක අංශ පියවර ගෙන තිබේ.
මෙවර පෙරහැරට කාවඩි කණ්ඩායම් සහභාගී කරවීම සම්බන්ධයෙන් ප්රබල පාතාල කල්ලි නායකයන් දෙදෙනෙකු අතර ඇති වූ ආරවුලක් හේතුවෙන් දේවාලය අසල නිවසකට වෙඩි ප්රහාරයක් එල්ල වී තිබුණි.
මෙම තත්ත්වය මත ඇති වූ දැඩි උණුසුම් වාතාවරණය සැලකිල්ලට ගෙන, පෙරහැරේ කාවඩි නර්තන කණ්ඩායම් ගමන් කිරීම තාවකාලිකව අත්හිටුවීමට පොලිස්පතිවරයා විසින් මාතර දිස්ත්රික් ලේකම්වරයා වෙත නිර්දේශයක් ද ඉදිරිපත් කර තිබුණි.
කෙසේ වෙතත්, පැන නැගී ඇති අර්බුදකාරී තත්ත්වය පිළිබඳව ඊයේ (27) පස්වරුවේ මාතර දිස්ත්රික් ලේකම් කාර්යාලයේදී විශේෂ සාකච්ඡාවක් පැවැත්විණි.
මහජන ආරක්ෂක අමාත්යවරයා, අමාත්යාංශ ලේකම්වරයා, පොලිස්පතිවරයා සහ අදාළ නිලධාරීන්ගේ සහභාගීත්වයෙන් පැවැති මෙම සාකච්ඡාවේදී තීරණය වූයේ පසුගිය වසරවල පෙරහැරට සහභාගී වූ සියලුම කාවඩි කණ්ඩායම්වලට මෙවරත් අවසර ලබා දිය යුතු බවයි.
පෙරහැරේ ආරක්ෂාව වෙනුවෙන් පොලිසිය සහ ආරක්ෂක අංශ සාමාජිකයන් 1,500කට අධික පිරිසක් යොදවා ඇති අතර, කිසිදු ප්රචණ්ඩ ක්රියාවකට හෝ විනය විරෝධී කටයුත්තකට ඉඩ නොතබන බව පොලිසිය අවධාරණය කරයි.
